Dankwoeërd Aod-preens Sander I

21 februari 2018

Leef Brökwagters & Brökwagterinne,

Ich heb enorm opgekieëke tieëge mien abdicasie. Vae hebbe zoeë ’n geweldjige tiêd gehadj. Mien devies begos met ‘Dit és oeës kâns’ en ich deênk det vae det ouch met 111% aangepaktj hebbe, ich same met mien adjudante, de vröllie en alle Brökwagters.

Vanaaf de uutroôping hebbe vae fantastisch völ fillesitasies mooge ontvânge. ’n Alike kast vol kaarte, vae hebbe d’r bekans unne kast beej motte zette. ’t Enthousiasme woor vervolges allein mer groeëter beej oeës receptie, woeë d’r zoeë fantastisch völ mînse woore det de obers nog neet mieër de zaal doeër kóste. Det és ’n geweldjig complimênt, want ’t beteikentj det vae same met Bosseve ’t allergroeëtste fieëst maakdje det mer kós. Toen kwaome de Boonte Aovendje, woeë vae ouch nog e bitje flawwekul maakdje met mien adjudant Joeri, di-j vae prissetieëre as de mieëst begieërlike vreejgezel van Bosseve. Helaas esj neet gelöktj det vör ’t indj vanne vastelaovendj op te losse, dus vröllie weite woeë det ze terecht kinne. Beej de Damensitzung heb ich hoeëgstpersuuënlik hieël effe oppe buhne moge kieke, kei-j sjiek um de hieël zaal vol met vröllie in knalroze te zeen! Ouch now activiteite as de beercantus en ’t boremoôs aete vör de Borebroeleft woore ’n gigantisch succes.

En neet allein op Bosseve woor ’t groeët fieëst. Vae zeen nao mieërdere recepties gewaesj. Mer waat gruuëts bin ich op ’t feit det ich dit jaor same met Preens Phil I vanne Rogstaekers, vanuut oeës Bosseve, de vasteloavendj veur heb moge gaon. Phil hieët met zien Vastelaovendjlidje ’n groeëtse actie opgezatte vör de Cliniclowns. Det alle Brökwagters vervolges same inne collecte beejlegge en ’n cheque van mer leefst € 1111,11 prizzetieëre toeënt de verboôngeheid vanne Brökwagters.

En zjuust det ving ich zoeë belangrieëk: dae verboôngeheid. Neet allein dan met dae collectebös, mer ouch as vae same fieëst make en vastelaovendj veêre. Vastelaovendj gieët oeëver ’t laeve. ’t veêre ervan en geneête. Det wiltj neet zégke det alles in ’t laeve good gieët, want d’r zeen ouch hieël völ dinge dae fout gaon en zake dae neet leuk zeen. Mer same geneête vae en make vae d’r ’t allerschoeënste van. Tiêdes de vastelaovendj veênge vae dan ouch steun beej elkaar, staon met ’n pötje beer waat te zanike en veêre vae det ’t laeve zoeë good és.

Waat ich belangrieëk ving mette vastelaovendj és de meziek. Ich bin dan ouch enorm gruuëts det vae beej de Brökwagters zoeën sjieke kepel hebbe. De kepel ligtj mich enorm aan ’t hert, de meziek és ’t kloppendj hert vanne vastelaovendj.

Ich dank alle Brökwagters, joonk en oud, zoeëwaal binne as boete de vereiniging, vör alle enthousiaste beedrages aan de schoeëne vastelaovendj. Vör de allerleste kieër moog ich mien adjudante Roel, Joeri en Tessa en de vröllie Ilona en Chantal neume. Mien dank vör dae kammeräöj és oneindig! Same hebbe vae geknaldj tiêdes ‘t 5×11 jubileumjaor vanne Brökwagters. Ich bin d’r mieër as gruuëts op det ich uch as jubileumpreens veur heb moge gaon tiêdes de vasteloavendj van 2018. Vanuut de groônd van mien hert: dankjewel!

Dit waas oeës kâns, 5×11 vôl Ambiance!
Drei-j kieër Bosseve alaaf!

Aod-preens Sander I
VV de Brökwagters

  • V.V. de Brökwagters