Dankwoord jeugdpreenses Kim I

21 februari 2018

Leef wichter van Bosseve, Brökwagters en Brökwagterinne. Ich, jeugdpreenses Kim I wil ‘n aantal minse bedânke vör det gewêldjig fieëst van de aafgeloupe waeke.

Mien mam vör alle dinger di-j zeuj heet geregeldj en vör het striêke vanne blouse. Mien pap det hae jao heet gezagdj op de aovendj det Vorst Robbert bêldje. En mijn zös Yvette di-j d’r mieëstal beej es gewaesj.

De aojers vanne jeugdraod di-j d’r mieëstal allemaol beej waore. De moôders vör al di-j lekkernije di-j d’r op de taofel stónge. En de vaders di-j de striêd met de wîndj aan zeen gegânge en tot drejmaol tow de vaantjes hebben opgehânge. Aojers van mien adjudânte Peggy, Jim, Huib, Jolanda, Robert, Esther vör de gezellige aovendje di-j vae tiêdes de veûrbereidinge hebbe gehadj. En Robbie vör ‘t make van det sjieke nummer. (waardeloos) Dj: zetj ‘t nog es op.

En e speciaal woord van dânk aanne jeugdbegeleiding di-j neet allein vör mich klaor stónge mer vör de hieële jeugdraod. Zónger dees minse waas d’r geine jeugdvastelaovendj op Bosseve.

Dan: waat es het gewêldjig as dejje op e receptie door de Brökwagterskepèl nao bove wurtj geblaoze. Kepèl bedanktj vör de muzikale noeët.

‘Ne dikke merci aan Vorst Robbert en Kanseleer Robert. Waat hebbe jullie mich edere kieër gewêldjig aangekondigdj.

Preens Sander en adjudânte Tessa, Roel en Joeri: waat bin ich bli-j det ich met jullie dit jaor heej op Bosseve met de vastelaovendj veûrop mocht gaon.

Ich kan neet edereîn met naam bedânke daorum zégk ich dânke, dânke, dânke aanne wichter en de volwassene di-j waat vör mich beteikendj hebbe of met os zeen kome fieëste en in ‘t bezûndjer de schutterij, scouting, Herrieschöppers en dan alle lede van VV de Brökwagters.

Dan blieftj ‘r nog eine groep over dae ich nog neet geneumdj heb en det zeen de 11 wichter van de jeugdraod en mien twieë adjudânte: Kim Nijsen en Dena Thijs. Waat vóng ich ‘t kejsjiek um met uch deêze vastelaovendj te vere. Waat hebbe vae gefieësj.

Zoeë: det es gezagdj mer auch gemeindj.
Jeugdpreenses waere beej de Brökwagters waas waat ich altiêd al woej. Ich heb dan ouch in mien openingsspeech gezagdj det ich acht jaor op dit momênt gewachtj heb um heej jeugdpreenses te waere en now zitj ‘t er alweer op. Ich mót zoeë dadelik de sleutel inlevere
aan de Vorst. Mer ich weit zeker det zeuj heejmej volgendj jaor weer emes ângers hieël gelukkig make. Ich loup dan heej neet mieër veûrop beej de Brökwagters, mer in april beej ‘t keûning schete van de schutterij loup ich weer veûrop as bordjesdrager beej de schutterij.

Veûrdet ich ‘t woord trök gaon gaeve aan Vorst Robbert sloet ich vör de léste kieër aaf ónger mien devies:
Met dees daag gein gepaaf mer drej kieër Bosseve alaaf – Bosseve alaaf – Bosseve alaaf – Bosseve alaaf

  • V.V. de Brökwagters