Leef Brökwagters en Brökwagterinnekes,

De Vastelaovendj 2020 zitj dur op, ich bin weer gewoeën Jeroen. Mer zal veur altied Aod-preens vanne Brökwagters zeen. Waat bin ich enorm grueëts, mer veural auch hieël erg verieërdj det ich dit schoeëne vastelaovendj fieëst heej op Bosseve samen met mien vraw Peggy en mien gevolg heb moge veur gaon. En waat hebben vae schoeën now herinneringe gemaaktj.

Wi-j ze mich op 1 oktober kwome vraoge woor ich komplieet verrasj, en jao dao heb ich in ut verleeje waal us over gedraumtj. En now kreeg ich dae kans, waat geweldjig. Dae ierste waek heb ich bijna gein oug dicht gedaon. Now hebbe vae dit mej gemaaktj mer de werkelikheid overtreftj elke draum, elke gedachte elke verwachting……… zoë GAAF!!!

Vae hebbe un gezin met un verhaol en det maaktj ongerdeil uut van wi-j det vae in ut laeve staon. Vae zeen os bewusj van het feit dejae motj geneete van ut mement, det heef ozze dochter Vive* os laote zeen. Zoë zeen vae auch deze vastelaovunj ingegange. Neet te völ veuruut kieke geneetj met de daag, met os gezin en met de minse um os heer.

Waat hebbe vae al ontzettendj völ lol gehadj tiedens de veurbereidinge zoeewaal met os gevolg mer auch met de preense begeleiding, de uutrooping waas geweldjig en as vorst Roy uch dan veur de ierste kieër aankondigdj as de nowe preens in un bomvol Brökwagterspelies…… det es un onbeschrieflik geveul!! Aod-preense zulle det kinne beame.

Waat vong ich ut geweldjig um te zeen det unne daag ierder Jeugdpreenses Gwen en heur adjudante Phill en Desny beej de jeugd uutgerope woore, drei vriendinne deej un speciaal plekske hebbe gekrege in mien hert. Un enthousiaste jeugdraod met un geweldijige groep betrokke aojers en super jeugdbegeleidings team maaktje ut veur os hieëlemaol kompliet!!

Vae hebbe haard motte lache um de flauwekul inne boonte aovundje, ut boore broedspaar en gevolg zeen geneete tiedens de boore broeleft, genote vanne sfeer en de atjes beej de biercantus, wederom ein super geslaagdj Herstebal met nowe energie belaeftj en de dames hebbe genote van weer ein top Damessitzung. Unne dikke merci aan alle minse die in dees activiteite zoee völ plezeer en energie legge.

Vae hebbe genote vanne scheile zeiver en schoeën gesprekke met de raod van elluf, de vröllie en de Brökwagterskepel as vae dur met de bus weer op uut trokke.

Wi-j grueëts heb ich mich geveultj as vae weer met ein groeëte club Brökwagters nao bove waerdje gespeultj dooër de geweldjige klanke vanne kepel, weej grueëts heb ich mich geveultj um dees geweldjige vereiniging te moge vertegenwoordige oppe buhn. Weej grueëts heb ich mich geveultj as ich de snoetjes van Kane en Raf zoog die mej genote van preens papa.

Waat hebbe vae völ leeve, hertverwerremdje reacties en fillicetaties gehadj op os preenseschap en zoee völ oprechte komplemente op wi-j vae os hebbe geprissentieerd. Ich kan uch vertelle, det deut wat met os, det zitj hieël deep en det zulle vae noeets vergaete.