Dankwoord hoogheden 2023
Preens Roel I en Jeugdpreens Len I kijken terug op een geweldige vastelaovendj. Met hun dankwoord, tevens voorgedragen voorafgaand hun abdicatie, danken zij alle feestvierders op Bosseve.
Dankwoord Preens Roel I
Leef Brökwagters en Brökwagterinne,
Waat un geweldjig seizoen hebbe vae achter de rögk en waat e schoeën herinneringen hebbe vae samen gemaakj! Same met mien gezin, mien adjudanten en de vröllie!
T' begin ging helaas neet zoeë-as vae verwachtj haaje, 't ging neet hiëlemaol op rolletjes zulle vae mer zegke. Allein mien adjudant Bas ging op rolletjes, mer dan auch neet in gooje zin, mer in un 'ne rolstool.
Mer same hebbe vae d'r toch nog 't beste van gemaaktj en waas 't zoeë-as gezagdj geweldjig!
Ich wil mien gevolg dan auch bedânke vör alle hulp en schoeëne tiêde die vae hebbe gehadj.
Gaer wil ich dan auch un dikker merci vör oeëse hakker Henrie, oeëse roller Bas en oeëse vrollie die oppe achter- en vuuërgrond völ dinger geregeldj hebbe! En neteurlik wil ich mien vraw Annelie extra bedânke vör alle steun die ich gehadj heb. Vae hebbe un vervaelendje tiêd achter de rögk 't waas dan auch extra spisjaal en fein det de letste waeke hebbe kinne geneete same met oeës wichter en oeës vreendje.
Waat heb ich verder fein minse lieëre kinne en waat un top vereiniging zeen de Brökwagters toch!
Un fantastische familie woeë det ve ein groeët fieëst me-j hebbe gemaaktj.
Waat auch kei sjiek is van dieës minse, ze staon altiêd vör mekaar klaor en det maaktj 't auch zoeë fein. Dit is un club woeë det ich de komendj jaore nog gaer van wil geneete!
De Brökwagterskapel, di-j os hieël dek nao boeëve hebbe geblaoze, constant hinnevel en noow nog! Wi-j gaaf waas 't det vae met zieën alle same d'r ein groeët fieëst van hebbe gemaaktj. Auch beej oeës zöstervereinigingen woeë det vae hebbe laote huuëre weem die Brökwagters zeen, bedanktj!
Mer auch jeugdpreens Len I met zieën raod van elluf, man, man waat woor 't toch sjiek det vae samen op paad ginge, ein groeët fieëst! Same met de jeugd woeë auch miene zoeën Brent in zoot woeë det ich kei-j gruuëts op bin! Same met de aojers d'r eine….of nog völ mieër drînke mer vörâl hieël völ plezeer gemaaktj! Jaomer det vae neet dekker beejeîn woore. De momenten det vae same woore, woore geweldjig, laat en zaat! Di-j momènte koester ich dan auch.
Jeugdpreens Len, waat hej-jae 't toch geweldjig gedaon! Altiêd good vuuërbereidj en met un good verhaol oppe buhn! Echt hieël knap wi-j dej-jae det deedj. De momènten det vae samen oppe buhn stonge zeen momènten die ich noeëts zal vergaete. Eur eigen nummer, "non stop vol erop" es volgens mich hieël good blieëve hange, neet allein heej mer auch inne rest van Wieërt en omgaeving! Echt kei-j sjiek! Waat hebbe vae d'r met zieën alle ein groeët fieëst van gemaaktj!
Verder wil ich mien pap, mam en zus bedanken vör de steun en hulp die vae dit seizoen van uch gekrege hebbe. Neet allein 't aafgelaupe seizoen mer zieëker auch 't aafgelaupe jaor, en det kin ich neet dek zat zegke!
Vör alle vastelaovendj- en neet-vastelaovendj veerders, ich wil uch gaer bedânke vör al di-j donaties die-jae hetj gedaon aan de actie van Bregje. Det es hertverwermendj en auch wieër un teike wi-j betrokken dae-jae zeetj!
En noow de minse di-j ôs van begin aaf aan begeleidj hebbe, bijna 2 jaor langk! Det waas volgens mich auch waal noeëdig ?. Ich wil uch apart beneume. Waat hebbe vae same unne schoeëne tiêd achter de rögk! De gezellige vergaderingen vuuëraaf 't seisoen woor det vae ôs good hebbe kinne vuuërbereidj en doeër de top begeleiding tiêdes de 6 waeke hebbe vae geweldjige dinger me-j moge make. "Zeetj gewoeën uch zelf", is waat ze mich zagte, en det hebbe vae gedaon! Geweldjig wi-j de-jae mekaar aanvöltj, super bedânktj, de 3 musketiers, Vorst Roy, Kanselier Arno en Senator Jasper!
Nogmaals eederein bedanktj vör 't top seizoen det vae same belaefdj hebbe. Ich en auch mien gevolg zullen dit noeëts mieër vergaete!!
Bedânktj!!
Preens Roel I
Dankwoord Jeugdpreens Len I
Leêve Brökwagters en Brökwagterinne,
De ieërste, de eînige en métein auch mien léste speech van un pepeerke.
Un pepeerke det ich neet ieërder in hang haaj……want dees speech woeëj ich neet veûrbereiden……… dees speech haaj ich hieël gaer nog efkes uutgestéldj. Dju toch……waat un fieëst……waat is ut völ en völs te gaw verbeej gegânge!
Genoote vanaaf begin oktoeëber. Want toen zeen de veûrbereidingen in volle gang begonne en waat woore det al völ onvergaetelikke aovendje.
Vriêdig 13 jannewari, unne gelöksdaâg vör mich, haaj ich rejaal beet……..de ALLERSJIEKSTE VANGST OEËTS.
Met zien alle vanaaf toen: NON STOP VOL D'R OP!!
Dânke pap en mam die vanaaf moment 1 zagte: "vae gaon dur same vôl vör Len".
En det hebbe vae gedaon. Niks waas te gek. Neet normaal zoeë sjiek. Dânke Jip en Sam. Jip dae vanaaf ut begîn dit groeëte geheim met mich deîldje en same hebbe jullie volop mej gefieësj. Ich bin gruuëts op uch!
Dânke opa's en oma's. Oma Els die de tekst van oeës geweldjige fieëstnummer schreef, opa Jan dae de medalies sponsordje en opa en oma Brazil die eur vleegtickets um bookdje en noow zelfs vanuut Brazilië nog mej geneete. Auch reserve oma Jeanne! Jullie hebben same mej genoote vanaaf moment 1 en stônge altiêd vör os klaor!
Dânke aan al os vreendje en femiêlie. Die zoeë enthousiast woore, met zien alle nao de recepsie zeen gekoome en vandaag zelfs mej leepe inne optocht (ich wis van niks).
Dânke Maartje en Pieter. Maartje vör de ieërste teîkeningen van mien medalie. Pieter vör twieë kieër ke-j en ke-j lekker aete beej os thoês vör ooze hieële groep.
En dan mer medeîn door nao ooze geweldjige groep. Vlak nao mien uutrooping zag ich al det ooze groep…..met mien adjes, de jeugdraod, os aojers en breurkes en zösterkes aanveuldje as ein groëete femiêlie! Dae band is allein mer sterker gewoore. Waat hebbe vae dur al die weekenden un MEGA fieëst van gemaaktj same. Um noeëts mieër te vergaete…….en vae zeen nog neet uutgefieësj same dînk ich zoeë.
Deeze fantastische groep waerdje samengesteldj door de beste jeugdbegeleiders die vae os haaje kinne weense! Esther, Jolanda, Ingrid, Gijs, Raf, Luc en Remco DÂNKE vör alle gooj zörg en hieël völ gezelligheid mer vöral veûr ut feit det jullie os as groep dees kans hebbe gegaeve!
En det neteurlik binnen dees sjieke Brökwagtersvereiniging. Un vereiniging um ke-j en ke-j gruuëts op te zeen! Met de bös ginge vae dék same op paad. Waat keumtj dur dan unne sjieke groep binnen. Dânke aan de kepèl, de groeëte raod, vorst Roy, kanseleer Arno en neteurlik unne dikke, dikke, dikke merci aan miene groeëte kammeraod Roel, adjes Bas, Henrie, de dames en de wichter. Waat un fantastisch gezelschap woeë mej vae same veûrop mochten gaon.
As vae neet met de bös op paad ginge haaje vae sjieke fieësjes heej op Bosseve!
Linda, Maikel, Marco en Noël; merci vör eur gastvreejheid, gooj zörg en ke-j ruig fieësjes in os eigen Brökwagterspeliês en Brökwagterskefee.
En waat hebbe vae gezôonge, gedansj en gekaaktj op os fieëstnummer NON STOP VOL D'R OP. Un leedje, met videoclip waat nog schoeëner waerdje dan vae haaje kinne bedînke! Danke aan Robbie, aan Jesse en aan BCM Music vör dees körs oppe taart.
Veûrdet ich aafsloêt kiek ich heej de zaal in. Vastelaovundj same! Dânke aan uch allemaol: aan al die wichterkes die met os hebbe gefieësj en met sjieke kleurplaten mej kleur goove aan deeze vastelaovendj. Dânke aan edereîn die op activiteiten aanwezig woore of op waat vör meneer dan auch iets vör os beteîkendje.
Veûrdet ich echt aafsloêt kiek ich toch auch nog gaer unne kieër achter mich.
Moog ich ut allergroeëtste applaus vör de mieëst fantastische jeugdraod.
Dânke Neele, Sanne, Tygo, Fre, Lynn, Meerle, Julie, Brent, Lize, Asyu Su, Luuk.
Veûrdet ich dan echt, echt aafsloêt kiek ich auch nog gaer unne kieër lînks en rechts naeve mich! Ich haaj mich geîn baeter adjes kinne bedînke. Roan dae neet zoeë good wis of hae waal zoeë in the picture zooj wille staon en Tygo dae dit neet verwachtj haaj want hae zitj in groep 7. GRUUËTS bin ich op uch en op os same. Same met eur aojers Chico, Renate, Roel, Jeanine en eur zösters Gwen en Luna.
Unne dikke merci det jullie met mich dit onvergaetelikke avontuur zeen aangegânge.
Veûrdet ich dan echt, echt, echt aafsloêt vör de aller, aller, léste kieër mien devies…..
Groeët en ke-j gruuëts woor ich met dees vaere oppe kop
Met zien alle: NON STOP VOL D'R OP
Oppe wichter vastelaovendj van Bosseve unne 3 x Bosseve Alaaf
Bosseve- Alaaf
Bosseve- Alaaf
Bosseve- Alaaf
Jeugdpreens Len I