Dankwoord hoogheden 2024

icoon-brokwagters-rood

Preens Luc I en Jeugdpreenses Janne I kijken terug op een geweldige vastelaovendj. Met hun dankwoord, tevens voorgedragen voorafgaand hun abdicatie, danken zij alle feestvierders op Bosseve.

Dankwoord Preens Luc I

102_231211_Brokwagters_Groot_Flitzer

Leef Brökwagters en Brökwagterinnekes

Veur we aan al det treurige gedoons beginnen, laote vae ieërst nog ff wat aafhandelen. Want vanaaf de ieërste daag zeen we heej hej-op bezig gewaesj met het verkaupe van PreensHeerlijk. Dae waas gelukkig al wieët veur vandaag uutverkochtj. Daonaeve hebben we aug nog ’n kloeëttereej gehaoje oppe Weens van de Preens. En dao hebben we ’n schoeën bedraag mej opgehaaldj vör de jeugd van de Brökwagters. En det zulle vae dan auch mer uutreike, en det wil ich gaer doon aan inmiddels Aod-Jeugdpreenses Janne I.

Dan zulle vae d’r noow auch mer aan gaon geluive. Det ich heej vandaag zooj staon bäöke oppe bühne hejje neteurlik ammaol al op 6 jannewari inne agenda gezatte. Dus we zullen es gaon kieëke, weej wieët vae kome. Vanaaf ’t moment det vae op 6 september terugkwoome van vakantie, belaef ich mieëne jongensdraum. Mer noow esj toch tieëd um wakker te waere. Veur we det gaon doon wil ich ieërst ’n aantal mînse bedânke.

As ieërste neteurlik Britt. Ich mot d’r ff um leege, mer volges mich hebbe vae dit scenario al per ongeluk op ozze ieërste date oeëts besproeëke. Wat hebben we d’r allebej van genoeëte, waat waas ’t sjiek. Merci!

En dan mieën gevolg, Remco, Jordi, Pieter, Jorg, Iris en Anne. Bedânktj det jullie ongerdael woeejje zeen van al mieën gekke ideeën. En als ’t nog neet gek genog woor, um ze nog net wat gekker te maken!

Aod-jeugdpreenses Janne, dieën adjudanten en de jeugdraod van Elf. Aug jullie bedânktj vör alle schoeën momente. Wat hebben we toch vul gelachen en gesproonge. En dan mot ich neteurlik auch neet die aojers van jullie ammaol vergaete! Bedânktj!

Dan zeen d’r nog n paar mînse die ich zeker neet moog vergaete, die jeugdbegeleiding. Wat waas ’t sjiek um jullie veur de gek te haoje. Volgendj jaor zeen Remco en ich d’r gewoeën weer beej! En auch die ZZP-jeugdbegeleiders Arno, Puuz (Gijs) en Stan, bedânktj vör t invallen!

Weem ich aug zeker neet wil vergaete zeen de mannen van de Raod van Ellef! Vae koste mekaar al ’n bitje. Mer wat heb ich d’r van genoeëte jullie nog baeter te lieëre kinne en van dae schaele zeiver en flauwekul. Aug de vröllie! Merci det jullie d’r altieëd met zoeë vul beej woore! Songer jullie gieët t neet doeër!

En dan de kapel. Wat mot ich dao nog van zeggen? Ich zooj uch hieël cliché ‘n 10 kinne gaeve dit seizoen. Misschien waal ‘n 11. Mer jullie krieëge van mig ’n dikke 20 met ’n knipaug! WAHNSINN!

Auch wil ich nog gaer os pap en mam bedânke vör alle hulp! En dan moog ich neteurlijk auch mieën schoeënaojers en Kim neet vergaete. Dikke vette merci!

Marco en Noël, auch jullie bedânktj! Waat sjiek waat jullie heej op korte tieëd hebben nieërgezatte! Zoeëwaal Don Bosco als Aod Bosseve open, waat hejje det good gedaon! De tent heej vreug open, terwijl ’t sdaagsdaoveur nog laat woor in ’t Brökwagterskefee. En vae kinne ’t weten, want vae hebben ’t zelf dek gecontroleerdj!

Auch bedânktj aan eederein dae ich noow vergaete bin! De vreendjegroep, eederein dae os ’n kaart heet gesteurdj of oppe resepsie woor.

En tot slot neteurlijk nog speciale dank vör mieën preensebegeleiding! Kanseleer Arno, Preensebegeleider Jeroen, waat hebben vae jullie aaf en tow gemisj as dejje met de jeugd mejwoortj. Mer det snappe vae! Merci wat dejje vör os hetj gedaon! En dan Senator Jasper, wat waasj n fieëst met uch. Eeder aovendj- en middigprogramma stongdje paraat. Zeker as vae weer es wat bedachtj haajje um d’r op uut te trekke! Merci vör alles, eur begeleiding en tegeltjeswijsheden!

En dan as leste Vorst Roy, danke veur eur vertrauwwe in mich, in os, um heej op Bosseve de Vastelaovendj veur te gaon. We hebben d’r van genoeëte, hopelijk gae auch! Hertelijk bedânktj!

Zoeë, dan heb ich noow genog gezaniktj. As ich zoeë nog eine kieër aafsloeët met mieën devies dan hoop ich det de kapel snaptj wat ze in mooge zetten.

Nou, nog eine kieër um t aaf te lieëre:

"Met lol, fieëst en humor in de pan, brouwe vae d'r nne geweldjige Vastelaovendj van!"

Dankwoord Jeugdpreenses Janne I

017_231211_Brokwagters_Jeugd_Flitzer (Groot)

Leef Brökwagters en Brökwagterinnekes,

Veur ich begin, aan mien allerletste speech, wil ich mien adjudanten vraoge um de dooëze tissues met de mînse in de zaal te daele, want t zal heej oppe bühne, mer auch inne zaal, waal buhke waere.

Nou dao gaon ich dan:

157 daag geleeje steurdje os mam mien preensesse sollicitatiefilmke nao Luc van de jeugdbegeleiding met dao beej de tekst det ich hieel gaer preenses woej waere. En hieël gaer met Luc as groeëte preens naeve mich. Wie kos ich wieëte det ze Luc toen net gevraogdj haaije!?

152 daag geleeje beldje Vorst Roy of ich Jeugdpreenses van de Brökwagters wooj waere. Ich waas zoeë bli-j. Miene ieërste wîns kwaom uut.

141 daag geleeje, op kermismaondjig, vraog ich Fiet, Kiki, Kayleigh en Sara um mien adjudanten te waere. Waat waas ich bli-j det ze alle veer metein jao zagte. De veurbereidingen koste beginnen! In ut deepste geheim kwaome vae dek beej ein met de jeugdbegeleiders um alles veur te bereiden en uut te dînke. Danke vröllie, dejje al die waeke neave mich hetj gestange en der met mich overal t daak aaf hetj gehosj. Ich bin kei en kei grueëts ein van de gekkies te zeen.

Unne hieële dikke merci auch vör die geweldjige jeugdbegeleiders die alles in gooj banen hebben geleid en der vör hebben gezörgtj det t neet eine groeëte chaos woort en vae der eedere kieër netjes uutzooge:  Luc, Remco, Raf, Ingrid, Hanneke, Esther en Jolanda. En nateurlik neet te vergaete de stand-inns vör Luc en Remco; Gijs en Stan. Dânke dânke dânke.

40 daag geleeje waas ut dan eindelik de daag woeë ich al dae tieëd nao haaj uutgekeeke. Toen woort ich uutgeroope as Jeugdprinses Janne I. Jeugdprinses Janne I, waat kleenktj det toch sjiek hè.

Ich gaon gauw nog effe doeër met bedânke; Aojers van mien adjes; Anne, Arno, Erwin, Eveline, Bart, Wendy, Marcel en Martine mer auch Sep en Suus; bedânktj vör alle gooj zörg, de lekker sop, de gezelligheid en alle ânger hand en span deensten die jae hetj gedaon vör os. Auch unne merci vör alle aojers, breurkes en zösterkes van de jeugdraod, zonger uch zow t mer saai zeen gewaesj en zooje vae verhongeren op al die resepsies en ânger fieëstjes. En wat waas t sjiek um uch as eine groeëte groep samen te zeen inne optocht. Auch daovör unne dikke merci.

39 daag geleeje woort preens Luc I uutgeroope tot groeëte preens van de Brökwagters. En daomet kwaom miene twieëdje wîns uut.

Preens Luc I,wat bin ich grueëts op os twieë. Mer auch op eur en mien gevolg.  Waat hebben vae gelachen, gefieëstj en gehosj same en wat zeen vae dek blieëve plekken. Gae zörgde steeds det vae beej uch op t podium terecht kwaome en noeëts ôngergesnieëtj waerdje door de volwassenen. Waat moste vae toch zonger os gevolg. Saame hebbe vae Bosseve flink oppe vasteloavendjkaart gezatte. Leef Britt, Anne, Iris, Jordi, Pieter, Jorg en Remco en nateurlik mien eigen raod van 11: Kane, Morris, Loet, Finn, Thom, Jeremy, Stijn, Lobke, Saar, Veerle en Fenna unne hieële dikke merci vör dees fantasische waeke same. Waat mich betreftj zeen vae nog lang neet klaor met fieëste.

Brökwagtersvereiniging, Vorst Roy en in t biezundjer Kanselier Arno en Sander , gae hetj os op hang gedraage en os het vertrauwe gegaeve vör de vereiniging veurop te gaon. Arno, dânke vör t uutwerke van mien uutrooping en de vraagbaak te zeen vör os mam. En Sander, danke vör t monteren van de verschillendje filmkes. En met name det van mien prinsessensollicitatie.

Brökwagterskapel, kei sjiek wi-j dejjae de activiteiten muzikaal hebben opgefleurtj.

Marco, Noël, Wiesje en eur team, bedânktj vör die lekkere drenkskes en gooj zörg. Heej in Don Bosco en beej Aod Bosseve. Ich hoop det mien opvolgers volgend jaor heej auch kinne staon.

Auch mien juf Moniek wil ich effe neumen. Ze waas os super fan en overal beej.  Dânke vör dien betrokkenheid.

Opa en oma, danke dejjae blonktj van grueëtsigheid en mam en pap metein nao mien uutrooping overal met hetj geholpen. Van t bakken van cake, t maake van sop, strieëke van de heumes tot ut maake van un geweldjige ieëzere steek  as cadeau op mien resepsie. Unne hieële dikke merci. En vör de nowsgierige onger uch…jao jao opa heet det tikkie van die medalies betaaldj. Love you opa en oma.

En dan as letste os pap, mam en Tuur. Tuur, dânke dejje dek eur aafspraoke aafzagdtj um met mich mej te gaon fieësten. Gae zeetj grueëts op mich, det weit ich best. Mer ich bin des te grueëts op uch, umdet djae achter mich stôngtj en mich steeds heelptj beej t oefenen van mien speeches. Dânke.

Mam, dich hebs dien bein ônger dien kont uut gerendtj vör mich, metein vanaaf ut moment det Vorst Roy beldje. Door dich zeen de veurbereidingen van een lei-je daakske gegânge, wis ich wat ich mos zegge, waas alles geregeldj en stong eder wiekend alles klaor. Danke desse dur metein vertrauwe in haajs en der same met mich hieël vör bis gegânge.

Pap, ondanks dejje neet metein stongtj te spreenge um mien preensesseschap en wat opzoogtj tegen al die wiekenden motte gaon, ving ich dejje t der good vanaaf hetj gebrachtj. Ich heb gezeen dejje dek grueëts stongtj te kieke nao os clupke beej ein. Dânke dejje mich die kans hetj gegaeve en metein vanaaf t begin in mich as preenses geluiftj hetj.

Veurdet ich aafsloeët mot ich de allerbelangrieëkste mînse nog bedânken. En det zeejae, de mînse in de zaal, de mînse die der eder fieëst beej woore en zörgdje det het heej en beej Aod Bosseve kei en kei gezellig waas. Zonger uch geine vasteloavendj, want vasteloavendj veerdje same.

Dan kuumptj nôw t moment det ich echt aaf mot gaon sloeëte. Het moment woeë ich al 157 daag tegenop zeen.

Vör uch leef Brökwagters en Brökwagterinnekes sloeët ich dan now aaf ônger mien devies:

Vae blieven heej wie marshmallows plekke en gaon doeër mét hosse en kwekke.

Oppe wichter vastelaovendj unne 3 x Bosseve Alaaf

Bosseve - Alaaf
Bosseve - Alaaf
Bosseve - Alaaf

icoon-brokwagters-rood